राज्यातील सतरा लाखापेक्षा अधिक नागरिकांचे प्रकृति परिक्षण
आरोग्य विद्यापीठातर्फे ‘देश का प्रकृती परिक्षण’ अभियान
नाशिक| एनजे वृत्तसेवा| महाराष्ट्र आरोग्य विज्ञान विद्यापीठाने ‘देश का प्रकृति परिक्षण’ अभियानात अभियानातंर्गत राज्यातील सतरा लाखापेक्षा अधिक नागरिकांचे यशस्वीरित्या प्रकृति परिक्षण केले आहे.
विद्यापीठाच्या मा. कुलगुरु तथा निवृत्त कुलगुरु लेफ्टनन्ट जनरल माधुरी कानिटकर यांनी सांगितले की, मा. पंतप्रधान श्री. नरेंद्र मोदी यांनी नवव्या आयुर्वेद दिनाच्या पार्श्वभूमीवर ’देश का प्रकृती परीक्षण’ अभियानाची घोषणा केलेली आहे. या अभियानांतर्गत पूर्ण देशभरामध्ये आयुर्वेदानुसार प्रकृती परीक्षण मोहिम राबवली जात असल्याचे त्यांनी सांगितले.
विद्यापीठाचे मा. प्रति-कुलगुरु डॉ. मिलिंद निकुंभ यांनी सांगितले की, विद्यापीठातर्फे दि. 25 नोव्हेंबर 2024 पासून ‘देश का प्रकृति परिक्षण’ अभियानाला प्रारंभ करण्यात आला. या अभियानात विद्यापीठाचे संलग्नित 140 आयुर्वेद महाविद्यालयातील चौतीस हजार पेक्षा अधिक विद्यार्थ्यांनी सहभाग घेतला आहे. आजपावेतो सतरा लाखापेक्षा अधिक नागरिकांचे यशस्वी प्रकृती परिक्षण करण्यात आले आहे. या अभियानात विद्यापीठाचे गडहिंगलज येथील कै. केदारी रेडेकर आयुर्वेद महाविद्यालय, कोडोलो येथील यशवंत आयुर्वेद महाविद्यालय पदव्युत्तर शिक्षण व संशोधन केंद्र, नाशिकचे श्री सप्तऋगी आयुर्वेद महाविद्यालय व हॉस्पिटल, बुलढाण्याचे आनंदी शिक्षण प्रसारक मंडळाचे आयुर्वेद महाविद्यालय, छत्रपती संभाजी नगर येथील शिवा ट्रस्ट संचलीत यशवंतराव चव्हाण आयुर्वेद महाविद्यालय, सांगलीचे शांताबाई शिवशंकर आरळी आयुर्वेदिक हॉस्पिटल व कॉलेज, पुणे येथील भिमा शंकर आयुर्वेद महाविद्यालय, बुलढाण्याचे संत गजानन महाराज आयुर्वेद कॉलेज महाविद्यालयांनी मोठया संख्येने प्रकृती परिक्षण केले आहे.
ते पुढे म्हणाले की, या प्रकृती परिक्षण अभियानातुन राज्यातील नागरिकांची प्रकृति विषयक माहिती संशोधनासाठी उपयोगी ठरेल. राज्यातील नागरिकांचे आरोग्य, आहार यांचा सखोल अभ्यास करता येईल. समाजातील लोकांना मोठया प्रमाणात होणारे आजार त्यासाठी त्यांची रोगप्रतिकार क्षमता वाढविण्याठी उपाय शोधणे यासाठी महत्वपूर्ण ठरेल. या अभियानात क्यु-आर कोडव्दारे संबंधित व्यक्तीची नोंदणी करुन प्रकृति परिक्षण करण्यात येते तदनंतर ई-प्रमाणपत्र देण्यात येते. प्रकृती विषयक माहिती डिजिटल स्वरुपात संग्रहित करण्यात येत आहे. विद्यापीठामार्फत राबविण्यात येणारे प्रकृती परिक्षण अभियानाला नागरिकांकडून मोठया प्रमाणात प्रतिसाद मिळाला असल्याचे त्यांनी सांगितले.
विद्यापीठाचे आयुर्वेद विद्याशाखेचे अधिष्ठाता डॉ.मिलिंद आवारे यांच्या मार्गदर्शनाखाली आयुष विभाग व श्री सप्तश्रृंगी आयुर्वेद महाविद्यालय, नाशिक यांच्या संयुक्त विद्यमाने दिनांक 9 ते 11 डिसेंबर 2024 दरम्यान आरोग्य विद्यापीठात प्रकृति परिक्षण अभियान राबविण्यात आले. विद्यापीठातील सहाशे पेक्षा अधिक अधिकारी व कर्मचारी यांचे यशस्वी प्रकृति परिक्षण करण्यात आले असून प्रत्येक विद्यार्थ्यांने प्रतिदिन शंभर नागरिकांचे प्रकृती परिक्षण करावे असा मानस असून राज्यातील एकूण एक कोटी नागरिकांचे प्रकृती परिक्षण करण्याचा मानस आहे.
या अभियानाकरिता विद्यापीठाच्या आयुष विभागाच्या प्रमुख डॉ. गितांजली कार्ले व नोडल ऑफिसर डॉ.अनुश्री नेटके यांनी परिश्रम घेतले. प्रकृति परिक्षण अभियान विद्यापीठामध्ये यशस्वीरित्या राबविण्यासाठी श्री सप्तश्रंत्रगी आयुर्वेद महाविद्यालयाचे डॉ.किरण शिंदे, डॉ.भावना दंडे, डॉ.विजय पोटकुळे आणि इतर शिक्षकवृंद व विद्यार्थी यांचे सहकार्य लाभले. या अभिनातंर्गत प्रकृति परिक्षणा करिता इच्छुकांना विद्यापीठाच्या ’प्रकृती वेलनस सेंटर’ ला भेट दयावी असे आवाहन विद्यापीठाकडून करण्यात येत आहे.
