नाशिक रोड, प्रतिनिधी
आयएसपी-सीएनपी प्रेस कामगार व अधिका-यांनी मिळून महाराष्ट्रातील अतिवृष्टीग्रस्तांसाठी २५ लाख १२ हजार शंभर रुपयांचा मदत निधी जमा केला. मुख्यमंत्री देवेंद्र फडणवीस नाशिक दौ-यावर आले असता त्यांच्याकडे हा धनादेश प्रेस मजदूर संघाचे सरचिटणीस जगदीश गोडसे, कार्याध्यक्ष ज्ञानेश्वर जुंद्रे यांनी सुपूर्द केला. मजदूर संघाचे उपाध्यक्ष राजेश टाकेकर, रामभाऊ जगताप, कार्तिक डांगे, प्रवीण बनसोडे, स्टाफ संघटनेचे सरचिटणीस राहुल रामराजे, कार्याध्यक्ष रवींद्र गोजरे, उपाध्यक्ष सुंदर रमण, सहसचिव अविनाश देवरूखकर, संदीप व्यवहारे, आय.एस.पी. वर्क्स कमिटीचे उपाध्यक्ष मनोज सोनवणे, सचिव भूषण मेढे, पी.एफ.ट्रस्टी संतोष कुलथे, सचिन दिवटे आदी उपस्थित होते.
महाराष्ट्रात अतिवृष्टीने शेतीचे प्रचंड नुकसान झाले आहे. शेतकरी व सामान्यांच्या मदतीसाठी प्रेस मजदूर संघाने मदतीचे आवाहन केले होते. त्याला प्रतिसाद देत प्रेस कामगार व अधिका-यांनी २५ लाखांचा निधी संकलित केला.
या आधी प्रेस कामगारांनी विविध राष्ट्रीय आपत्तीवेळी मदत केली आहे. केरळची सुनामी, गुजरात आणि किल्लारी भूकंप, आत्महत्या केलेल्या शेतकरी कुटुंबांना मदत, दुष्काळग्रस्तांना तसेच उत्तराखंडातील पूरग्रस्तांना मदत केली होती. कोरोना काळातही लाखो रूपयांची मदत केली होती. प्रेसच्या सीएसआर फंडातून नामको रूग्णालयास सव्वा कोटीची अद्ययावत कॅन्सर व्हॅन, जिल्ह्यातील ग्रामपंचायतींना एकूण ४५ घंटागाड्या, सिन्नर व इगतपुरीत वाचनालयास प्रत्येकी ६५ लाख रुपये, महापालिकेच्या दिव्यांग शाळेस आणि नाशिक प्रबोधिनाला स्कूल बस दिली होती. बिटको रूग्णालयातील सव्वा तीन कोटींची रक्तपेढी आणि सीटी स्कॅन मशिन दिले. जिल्हा रूग्णालयात दूध बॅंकेसाठी ४५ लाख रुपये दिले होते. नोटबंदी काळात वर्षभर सुटी न घेता देशाला कोट्यवधी नोटांची अखंडपणे छपाई करून दिली होती. करोना काळात प्रेस कामगारांनी जीवाची बाजी लाऊन काम सुरूच ठेवले. या लाटेत शंभरावर कामगार मृत्यूमुखी पडले होते.
