सार्वजनिक वाचनालय सर्वसाधारण सभा
नाशिक। प्रतिनिधी
मागील काही काळापासून कार्यकारणीतील वाद न्याय प्रविष्ट असून दोन्ही बाजुने कोणीच माघार घेत नाही. मध्यस्थीनंतर ही ते भांडण मिटवायला तय‍ार नाही. त्य‍ामुळे संस्थेची प्रतिमा जनमानसात मलीन होत आहे. त्यांचे भांडण चालू द्या. तंटामुक्त गाव या संकल्पनेप्रमाणे आम्ही घटनेच्या चौकटीत राहून वाचनालयाचे कामकाज तंटामुक्त करु, अशी ग्वाही सार्वजनिक वाचनालयाचे अध्यक्ष प्रा.दिलीप फडके यांनी सभासदांना दिली.
सार्वजनिक वाचनालयाची १८५ वी वार्षिक सर्वसाधारण सभा रविवारी (दि. १२) मु.श.अौरंगाबादकर सभ‍‍ागृहात किरकोळ वाद वगळता शांततेत झाली. यावेळी सभासदांच्य‍ा शंकाचे निरसन करताना ते बोलत होते. यावेळी व्यासपीठावर उपाध्यक्ष वैदय विक्रांत जाधव, प्रा.सुनील कुटे, कार्याध्यक्ष संजय करंजकर आदींसह कार्यकारी मंडळाचे सदस्य उपस्थित होते. याप्रसंगी जुन्या पुस्तकांचा विषय, नुतनीकरणाचे रखडलेले कामकाज, वार्षिक अहवाल आदी मुद्यांवर चर्चा झाली. सभासद सुहास भनगे यांनी जुन्या पुस्तकांचा मुद्दा उपस्थित केला. सभासद पुस्तके नेत‍ात परंतू परत करत नाही. त्यांच्यावर कडक कारवाई करावी, अशी मागणी केली. संघर्षाच्या ऐवजी समन्वयाने हा मुद्दा निकाली काढू असे अध्यक्ष फडके यांनी सांगितले. तसेच जुन्या पुस्तकांचे स्कॅनिंग व ई बुक रेकाॅर्डवर काम करणार असल्याचे त्यांनी सांगितले. सभासदांकडून
प.सा.नाट्यगृह नुतनीकरण व मुलींची अभ्यासिका बांधकाम मुद्दा ही उपस्थित झाला. त्यावर बोलताना फडके म्हणाले, सहा टप्प्यांमध्ये नुतनीकरण केले जाणार आहे. परंतू निधीची कमतरता हा मुद्दा आहे. न्यायालयीन वादामुळे दानशूर व्यक्ती वादग्रस्त वाचनालयाला देणगी नको अशी भुमिका घेतात अशी खंत त्यांनी व्यक्त केली. आजमितीला वर्षभरात एक कोटी देणगी मिळाली असून मुलींची अभ्यासिका व नाट्यकर्मींसाठी ब्लॅक बाॅक्स उभारणीचे कामकाज लवकर सुरु केले जाईल, असे त्यांनी सभासदांना सांगितले. प.सा. नाट्यगृह नुतनीकरणाचा विषय मंत्री अाशिष शेलार व उदय सामंत यांच्याकडे मांडला असून त्यांनी सहमती दिली आहे. परंतू सबंधित खात्याच्या कार्यालयाकडून हा विषय मार्गी लागण्यास विलंब होत आहे. तरी वर्षभरात हा विषय मार्गी लागेल असा आशावाद व्यक्त करत नाट्यगृहाचे नाव बदलणार नाही, असे त्यांनी ठामपणे सभासदांना सांगितले. यावेळी मागील सभेचे इतिवृत्त, लेखापरिक्षण झालेला ताळेबंद, २०२६ – २७ चे अंदाजपत्रक, २०२४ – २५ वर्षाचा अहवाल, हिशेब तपासणीस निवड, सनदी लेखापाल निवड या विषयांना मंजुरी देण्यात आली. यावेळी मान्यवरांच्या हस्ते सावना दिवाळी अंकाचे प्रकाशन करण्यात आले.
कुंभमेळ्यासाठी डाॅक्युमेटरी
सिंहस्थ कुंभमेळ्यात सार्वजनिक वाचनालय‍चे योगदान असावे अशी मागणी सभासदांनी केली. त्यास सहमती दर्शवत वाचनालय‍त कुंभमेळा निगडीत पुस्तके वाचकांना उपलब्ध होतील, नाशिक कुंभची माहिती व जुने संदर्भ याचा मिलाफ असलेली डाॅक्युमेटरी प्रसारीत करु, असे त्यांनी सांगितले.
