जिपतर्फे दिव्यांग हक्क जागृती कार्यशाळेचे आयोजन
नाशिक प्रतिनिधि : दिव्यांग व्यक्ती हक्क अधिनियम २०१६ च्या कलम ३९ अन्वये दिव्यांग व्यक्तींबद्दल समाजात आणि प्रशासनात संवेदनशीलता निर्माण करणे अत्यावश्यक आहे असे प्रतिपादन जिल्हा परिषदेचे मुख्य कार्यकारी अधिकारी ओमकार पवार यांनी आज येथे केले.
नाशिक जिल्ह्यातील शासनाच्या सर्व विभागांतील वर्ग १ व वर्ग २ अधिकाऱ्यांसाठी एक दिवसीय कार्यशाळेचे आयोजन जिल्हा परिषदेच्या वतीने करण्यात आले.
कै. रावसाहेब थोरात नवीन सभागृहात पार पडलेल्या या कार्यशाळेचे उद्घाटन जिल्हा परिषदेचे मुख्य कार्यकारी अधिकारी ओमकार पवार यांच्या हस्ते करण्यात आले. त्याप्रसंगी मार्गदर्शन करताना ते बोलत होते. ते पुढे म्हणाल की, दिव्यांग व्यक्ती हे समाजाच्या मुख्य प्रवाहातील घटक आहेत, त्यांच्याकडे सहानुभूतीने पाहण्यापेक्षा त्यांना समान संधी मिळाव्यात, त्यांच्या क्षमतेनुसार त्यांना समाजात योगदान देता यावे, यासाठी प्रशासनाची भूमिका अत्यंत महत्त्वाची आहे. शासनाने दिव्यांग व्यक्ती हक्क अधिनियम २०१६ लागू करून त्यांना सन्मानपूर्वक जीवन जगता यावे, शिक्षण, रोजगार, आरोग्य, तसेच सार्वजनिक सुविधा यांचा समान लाभ मिळावा यासाठी ठोस कायदेशीर चौकट निर्माण केली आहे. मात्र, या अधिनियमाची खरी अंमलबजावणी केवळ नियमांमधून नाही, तर अधिकाऱ्यांच्या संवेदनशील व सकारात्मक दृष्टिकोनातून होऊ शकते असेही पवार म्हणाले.
यावेळी प्रादेशिक उपायुक्त माधव वाघ, उपमुख्य कार्यकारी अधिकारी सामान्य प्रशासन महेश पाटील, मुख्य लेखा व वित्त अधिकारी मारुती मुळे, मनपा समाजकल्याण उपायुक्त नितीन नेर, जिल्हा आरोग्य अधिकारी डॉ सुधाकर मोरे, कार्यकारी अभियंता इवद २ पंकजकुमार मेतकर यांच्यासह सर्व पंचायत समित्यांचे गट विकास अधिकारी व विविध शासकीय कार्यालयांचे अधिकारी उपस्थित होते.*
कार्यशाळेच्या उद्घाटन सत्रानंतर विविध विषयांवर तज्ञ वक्त्यांनी मार्गदर्शन केले. यशदा, पुणे येथील व्याख्याते नंदकुमार फुलेयांनी दिव्यांग व्यक्ती हक्क अधिनियम, २०१६ तसेच दिव्यांगांविषयी लागू असलेल्या सर्व संबंधित कायद्यांवर सविस्तर मार्गदर्शन केले. त्यांनी दिव्यांगत्वाचे विविध प्रकार, शासनाकडून देण्यात येणाऱ्या सवलती, सुविधा, तसेच शासनाची व स्थानिक स्वराज्य संस्थांची जबाबदारी या विषयांवर सविस्तर विवेचन केले. सामान्य प्रशासन विभागाचे उपमुख्य कार्यकारी अधिकारी महेश पाटील यांनी दिव्यांगांसाठी ४% आरक्षण, बिंदू नामावलीचे अद्यावतीकरण तसेच आरक्षणाच्या काटेकोर अंमलबजावणीबाबत सविस्तर मार्गदर्शन केले. जिल्हा दिव्यांग सक्षमीकरण अधिकारी हर्षदा बडगुजर, , यांनी प्रत्येक शासकीय कार्यालयात तक्रार निवारण यंत्रणा कार्यान्वित करणे, तसेच दिव्यांगांसाठी राखीव १% व स्थानिक स्वराज्य संस्थांसाठी ५% निधीबाबत सविस्तर माहिती दिली.
श्रीमती माई लेले श्रावणविकास विद्यालयातील विशेष शिक्षिका अर्चना कोठावदे यांनी कर्णबधिर प्रवर्गासाठी सांकेतिक भाषा व सांकेतिक दुभाषक (Sign Language Interpreter) सेवा याविषयी माहिती दिली. सहाय्यक जिल्हा आरोग्य अधिकारी डॉ. दीपक लोणे, यांनी आरोग्य, पुनर्वसन सेवा आणि UDID कार्डाच्या अंमलबजावणीबाबत मार्गदर्शन केले. कार्यक्रमाचे सूत्रसंचालन प्रबोधिनी शाळेतील विशेष शिक्षिका नाशिक मनीषा नलगे, यांनी केले, तर प्रस्तावना आणि आभार प्रदर्शन जिल्हा दिव्यांग सक्षमीकरण अधिकारी हर्षदा बडगुजर यांनी केले.
