१२ जानेवारीला डॉ. प्रा. सिल्केषा अहिरे लिखित ‘शांताबाई दाणी – भीममळ्यातील सूर्यफूल’ पुस्तकाचे प्रकाशन
नाशिक| एनजे वृत्तसेवा| आंबेडकरी चळवळीत महत्त्वपूर्ण योगदान दिलेल्या शांताबाई दाणी यांच्या कार्यकर्तृत्वावर प्रकाश टाकणाऱ्या ‘शांताबाई दाणी भीममळ्यातील सूर्यफूल’ या ग्रंथाचे प्रकाशन रविवार दि.१२ जानेवारी रोजी नाशिक-पुणे रोडवरील आंबेडकर नगर येथील रमाबाई आंबेडकर सभागृह येथे सायंकाळी पाच वाजता होणार आहे.
शांताबाई दाणी यांच्या आजपर्यंत उपेक्षित राहिलेल्या पैलूंवर प्रा. डॉ. सिल्केशा अहिरे यांनी या ग्रंथात प्रकाशझोत टाकला आहे. नागपूरच्या साई ज्योती प्रकाशनाने हा ग्रंथ प्रकाशित केला आहे. या ग्रंथावर विचारवंत छ. संभाजीनगर येथील प्रा. प्रतिभा अहिरे ( छत्रपती संभाजीनगर ), कॉ. किशोर ढमाले ( पुणे ), डॉ. संजय जाधव ( नाशिक ) हे भाष्य करणार आहेत.
याप्रसंगी करुणासागर पगारे, प्रा. गंगाधर अहिरे, नितीन भुजबळ यांची प्रमुख उपस्थिती राहणार आहे. यावेळी प्रा. सिल्केषा अहिरे, डॉ. विशाखा अहिरे यांच्या रांगोळीचे प्रदर्शनही होणार आहे. या कार्यक्रमास नागरिकांनी मोठ्या संख्येने उपस्थित राहावे, असे आवाहन अरुण घोडेराव, संजय आहेर, राजू देसले, प्रगतिशील लेखक संघ, विद्रोही सांस्कृतिक चळवळ, अंधश्रद्धा निर्मूलन समिती, डॉ. आंबेडकरनगर हौसिंग सोसायटी, डॉ. बाबासाहेब आंबेडकर ज्ञानविकास केंद्र, नाशिक व साईज्योती प्रकाशन, नागपूर आदिंनी केले आहे
