उत्पादन घटणार, बाजारभाव ही मिळेना!
अतिवृष्टीमुळे लाल कांद्याचा दसरा मुहूर्त हुकला, यंदा बाजारात उशिराने येणार
नाशिक, प्रतिनिधी| अतिवृष्टी आणि हवामानातील बदलामुळे लाल कांद्याच्या रोपावर मावा, करपा आणि पिळ रोगाचे आक्रमण झाले असून कांदापात पिवळी पडल्याचे दिसून येत आहे. नवा कांदा खराब होत असून महागडी औषधे आणून पीक वाचवण्यासाठी शेतकऱ्यांची धडपड सुरू आहे. आता द्राक्षा पाठोपाठ लाल कांद्याचे उत्पादन ही घटण्याची शक्यता कृषि क्षेत्रातील तज्ज्ञांनी व्यक्त केली. त्यात बाजार समितीत कांद्याला तीनशे ते चारशे रुपये प्रति क्विंटल भाव असल्याने उत्पादन खर्च निघणे कठीण झाले असून शेतकऱ्यांना आर्थिक फटका सहन करावा लागत आहे.
लाल कांदा हा दसऱ्याच्या आस पास बाजारात येत असतो, मात्र यंदा लाल कांदा बाजारात आला नाही बंगलोर येथील किरकोळ लाल कांदा आवक वगळता राज्यातील कांदा उशिराने बाजार समितीत दाखल होईल. यंदा अतिवृष्टीचा फटका उन्हाळा कांदा आणि शेतीत असलेल्या लाल कांद्याच्या पिकाला बसला आहे. अतिवृष्टी आणि त्यानंतरच्या ढगाळ वातावरण तसेच अधून मधून पडणाऱ्या पावसामुळे कांदा उत्पादनात घट होण्याची शक्यता शेती क्षेत्रातील जाणकारांनी व्यक्त केली आहे. शेवटच्या टप्प्यात जो उन्हाळा कांदा आहे, त्याला लासलगाव मार्केट कमिटीत १६ ऑक्टोबर रोजी किमान ४०० ते कमाल १४०० क्विंटल तर सर्वसाधारण १ हजार रुपये क्विंटल इतका भाव होता. दिवाळीमुळे लासलगाव समिती एक आठवडा बंद आहे. येथे लाल कांद्याची आवक नव्हती. शुक्रवारी बाजार समिती सुरू होईल. लाल कांद्याची इतर बाजार समितीत थोड्याफार प्रमाणात आवक आहे. एकंदरीत जे काही लाल कांद्याचे उत्पादन हाती लागेल त्याला भाव मिळेल का? असा प्रश्न शेतकऱ्यांना भेडसावत आहे.
अडीच एकरावर लाल कांदा लावला आहे. मात्र हवामानातील सातत्याने होणाऱ्या बदलामुळे कांद्यावर मावा रोगाचे आक्रमण झाले असून कांदा पात पिवळी पडत आहे. देवरगावच्या १५ एकर परिसरात लावलेल्या कांदा पिकाची तीच अवस्था आहे. महागडी औषधे आणून पीक घ्यायचे पण बाजारात कांद्याला भाव नाही अशी कोंडी झाली आहे.
रोहिदास लोखंडे, शेतकरी, येवला
तीन एकरवर रांगडा कांदा लावला आहे. कांदा काढावा म्हटलं तर बाजारभाव दोनशे ते तीनशे रुपये क्विंटल असा आहे. त्याच मावा, करपा आणि पीळ रोगाच्या प्रादुर्भावामुळे कांदा खराब होण्याची शक्यता असून दुहेरी संकट उभे ठाकले आहे. त्यामुळे बाजारात लाल कांद्याची आवक घटणार असून परिस्थिती अशीच कायम राहिली तर शेतातील कांद्यावर रोटर फिरवावा लागणार आहे.
सुभाष पालवे, शेतकरी, दोढी सिन्नर
कांद्याला सरासरी एक हजार रुपये क्विंटल इतका कमी दर मिळत आहे. शासनाने कांदा निर्यातीसाठी नवीन बाजारपेठा शोधण्याची गरज आहे. अतिरिक्त १.४५ लाख मे. टन कांद्याची निर्यात करण्यासाठी ठोस उपाय योजना राबविण्याची आवश्यकता आहे. त्यामुळे परकीय चलन प्राप्त होण्यास मदत होईल. नवीन येणाऱ्या कांद्याला दर नसल्याने शेतकऱ्यांना उत्पादन खर्च भरून निघणे कठीण आहे. अतिवृष्टी, लहरी हवामान आणि दर नसल्याने लाल कांद्याच्या उत्पादनावर परिणाम होईल. पंधरा ते २० टक्के उत्पादनात घट होण्याची शक्यता आहे.
जयदत्त होळकर, संचालक, लासलगाव, मुंबई कृउबा समिती.
चौकट
नाफेडच्या कांद्यामुळे दरात घसरण
एनसीसीएफ आणि नाफेडने ३ लाख मेट्रिक टन कांदा खरेदी केला. आता हाच कांदा बाजारात येत असल्याने कांद्याचे बाजारभाव कमी झाले आहे. उन्हाळा कांद्याला सरासरी १ हजार रु. प्रति क्विंटल असा भाव मिळत आहे. त्यामुळे शेतकऱ्यांजवळ जो काही उन्हाळा कांदा शिल्लक आहे. त्यातून दोन पैसे जास्त मिळण्याची अशा ही धूसर झाली आहे.
