प्रचाराच्या तोफा थंडावल्या, दिल्लीत ५ फेब्रुवारीला मतदान
नवी दिल्ली | दिल्ली विधानसभेच्या ७० मतदारसंघांमध्ये एकाच टप्प्यात दि. ५ फेब्रुवारीला मतदान होणार आहे. ७० जागांसाठी ६९९ उमेदवार निवडणूक रिंगणात आहे. ८ फेब्रुवारी रोजी निकाल जाहीर होईल. दिल्लीत तिरंगी लढत असली तरी सद्यस्थितीत आप आणि भाजप मध्येच सामना रंगणार असल्याचे चित्र दिसत आहे.
अरविंद केजरीवाल यांच्या नेतृत्वाखालील आम आदमी पक्ष (आप) सलग तिसऱ्यांदा निवडून येण्यासाठी जोरदार प्रयत्न करत आहे, तर आम आदमी पक्षाला रोखण्यासाठी भाजप सर्वतोपरी प्रयत्न करत आहेत. भाजप विरुद्ध आप अशी लढत असली तरी काँगेस स्वबळावर निवडणुकीला सामोरे जात असून या दोन्ही विरोधकांना टक्कर देत आहे. २०२० मध्ये भोपळा मिळालेल्या काँगेसने निवडणुकीसाठी चांगलीच कंबर कसली आहे. काँगेसकडून लोकसभेचे विरोधी पक्षनेते राहुल गांधी, खा. मल्लिकार्जुन खरगे आणि खा. प्रियंका गांधी यांनी प्रचारात सहभाग घेत भाजप व आप यांना टार्गेट केले.
दुसरीकडे भाजपकडून पंतप्रधान नरेंद्र मोदी, गृहमंत्री अमित शहा, जे पी नड्डा यांनी प्रचार सभा घेऊन आम आदमी पक्षाला भ्रष्टाचाराच्या मुद्यावरून लक्ष्य केले. तर आपकडून अरविंद केजरीवाल, मनीष सिसोदिया, मुख्यमंत्री आतिशी यांनी सर्व शकतीपणाला लावून मोफत शिक्षण, आरोग्य, वीज यावर आप मतदारांसमोर गेला आहे. मागील निवडणुकीत आप ला ६२ तर भाजप ८ जागा मिळाल्या होत्या. काँग्रेसला खाते ही उघडता आले नाही. यंदाही आम आदमी पक्षाचा हॅट्रिक करण्याच्या प्रयत्न असून त्यासाठी त्यांनी सर्व शक्तिपणाला लावली आहे.
