नाशिक – त्र्यंबकेश्वर रस्ता रुंदीकरण वादात

नाशिक| नाशिक -त्र्यंबकेश्वर रस्ता रुंदीकरणामध्ये छोटे- मोठे दुकानदार व शेतकऱ्यांच्या जागा जाणार असून त्याला स्थगिती द्यावी आणि त्या जागा संपादित न करता रस्त्याचे काम करावे अशी, भूमिका मुख्यमंत्री व दोन्ही उपमुख्यमंत्र्यांकडे मांडणार असल्याचे आ. हिरामण खोसकर यांनी सांगितले.

सिंहस्थ कुंभमेळ्याच्या अनुषंगाने नाशिक -त्र्यंबकेश्वर रस्ता रुंदीकरणासाठी शेतकरी टपरीधारक, दुकानदार, व्यावसायिक यांना ‘एनएमआरडी’ने नोटिसा पाठविल्या होत्या.त्याची मुदत १३ आक्टोबर रोजी संपली असून १५ ऑक्टोबरपासून बांधकाम हटवण्याची कारवाई होणार असल्याने याची बाधितांनी मोठी धास्ती घेतली आहे. तसेच आ. हिरामण खोसकर, पुरुषोत्तम कडलग यांच्या उपस्थितीत बैठक झाली. त्यानंतर खोसकर यांनी पत्रकारांशी बोलतांना सांगितले की, त्र्यंबकेश्वर, इगतपुरीत अनेक शेतकऱ्यांच्या जमिनी धरणे व रस्त्यांच्या कामासाठी गेल्या आहेत. त्यापैशातून शेतकऱ्यांनी २ ते ४ गुंठे जागा घेतल्या अन् व्यवसाय सुरू केला, आता त्यासुद्धा जाणार म्हटल्याने शेतकरी दुकानदाराच्या तोंडचे पाणी पळाले. अधिकारी ऐकत नसून वेळ मारून नेत आहे. यापूर्वी माजी मुख्यमंत्री एकनाथ शिंदे यांनी शेतकरी, व्यवसायिकांना दिलासा दिला होता. एकाच रस्त्याची गर्दी कमी करून ती अकरा रस्त्यांनी विभागली जावी याबाबत गेडाम यांना दोनदा निवेदन दिले असल्याचे त्यांनी सांगितले.

त्र्यंबक तालुक्यातील शेतकरी, दुकानदार, छोटे मोठे व्यावसायिकांवर होणाऱ्या अन्यायाविरुद्ध मुख्यमंत्री व दोन्ही उपमुख्यमंत्री यांच्याकडे दाद मागणार असल्याचे खोसकर यांनी सांगितले. तसेच रा. कॉ. शरदचंद्र पवार गटाचे युवक कार्याध्यक्ष पुरुषोत्तम कडलग यांनी सांगितले की, रस्त्याच्या दुतर्फा पंधरा पंधरा फूट कामाला विरोध नाही सेंट्रल लाईन मधील छोट्या मोठ्या व्यावसायिकांचे बांधकाम काढू नये त्यामुळे दोन हजार कुटुंब बाधित होणार असून शासनाने कारवाई थांबवावी अन्यथा आंदोलन करण्याचा इशारा कडलग यांनी दिला.