photo by staff

कनाशी आश्रमशाळेत ५१ विद्यार्थिनींना विषबाधा संशय

कनाशी आश्रमशाळेत ५१ विद्यार्थिनींना विषबाधा संशय
कळवण| प्रतिनिधी
तालुक्यातील कनाशी आदिवासी आश्रमशाळेतील ५१ विद्यार्थिनींना उलट्या, ताप, जुलाब आणि अंगदुखीचा त्रास झाल्याने त्यांना विषबाधा झाल्याचा संशय व्यक्त होत आहे. या घटनेमुळे एकच खळबळ उडाली आहे. सर्व विद्यार्थिनींवर कनाशी प्राथमिक आरोग्य केंद्रात उपचार सुरू असून, पाच विद्यार्थिनींना रुग्णालयात दाखल करण्यात आले आहे, तर इतरांची प्रकृती स्थिर असल्याने त्यांना परत शाळेत पाठवण्यात आले आहे.
आदिवासी विभागामार्फत कळवण तालुक्यातील आश्रमशाळांसाठी बागलाण येथील ‘सेंट्रल किचन’मधून अन्नपुरवठा केला जातो. दोन दिवसांपूर्वी याच किचनमधील अन्नामुळे दळवट आश्रमशाळेतील दोन विद्यार्थिनींनाही असाच त्रास झाला होता. या वारंवार घडणाऱ्या घटनांमुळे अन्नपुरवठ्याचा दर्जा निकृष्ट असल्याचा आरोप पालक आणि नागरिकांनी केला आहे.
घटनेची माहिती मिळताच आमदार नितीन पवार यांनी तातडीने आरोग्य केंद्रात धाव घेतली. त्यांनी विद्यार्थिनींची विचारपूस करून आरोग्य यंत्रणेला तातडीने योग्य उपचार देण्याचे निर्देश दिले. सुमारे एक तास तेथे थांबून त्यांनी उपचार व्यवस्थेची पाहणी केली. त्यांनी प्रकल्प अधिकारी अनुकुरी नरेश यांच्याशी संपर्क साधून याप्रकरणी तातडीने चौकशी करण्याचे आदेश दिले. या घटनेमुळे ‘सेंट्रल किचन’च्या कार्यपद्धतीवर गंभीर प्रश्नचिन्ह निर्माण झाले असून, नागरिकांनी नाराजी व्यक्त केली आहे. दोषींवर कठोर कारवाई करण्याची मागणीही जोर धरत आहे.


गेल्या ४-५ दिवसांपासून या आश्रमशाळेतील १५-२० मुलींना पोटदुखी, जुलाब, मळमळ, ताप, सर्दी आणि खोकला अशा त्रासाला सामोरे जावे लागत होते. आज ही संख्या वाढून ५१ झाली. १ सप्टेंबरपासून दहिवळे येथील स्वयंपाकगृहातून पुरवण्यात येणाऱ्या भाजी, वरण आणि भात या जेवणामुळे हा त्रास झाल्याचा संशय व्यक्त करण्यात येत आहे. त्यामुळे आता तो पुरवठा बंद करून कनाशी आश्रमशाळेतच मुलींच्या नाश्ता आणि जेवणाची व्यवस्था करण्याच्या सूचना प्रकल्प अधिकाऱ्यांनी मुख्याध्यापकांना दिल्या आहेत.


अकनुरी नरेश, सहाय्यक जिल्हाधिकारी : कनाशी आश्रमशाळेतील विद्यार्थीनीना वातावरणातील बदलामुळे ताप, खोकला झालेला होता. त्यांची तपासणी करून त्यांना शाळेत सोडण्यात आले आहे. ज्या विद्यार्थीनीना जास्त त्रास होता. त्यांना कनाशी प्राथमिक आरोग्य केंद्रात दाखल केले आहे. व आजाराचे अजुन दुसरे कारण आहे का त्याची तपासणी करण्यात येत आहे.

आमदार नितीन पवार: “दहिदुले सेंट्रल किचनमधून मिळणाऱ्या जेवणाबाबत तक्रारी येत आहेत. ही योजना आदिवासी विद्यार्थ्यांच्या हिताची नसून ठेकेदाराचे हित जोपासणारी आहे. त्यामुळे या योजनेचे ऑडिट करून हा ठेका रद्द करावा आणि पूर्वीप्रमाणे प्रत्येक आश्रमशाळेत ताजे जेवण तयार करण्यात यावे.

More From Author

photo by sushant ghodake

ग्रामदैवत श्री गोकर्ण गणेश मंदिरात सामुदायिक अथर्वशीर्ष पठण

Nashik-Mahanagarpalika

प्रभाग रचनेवर एकूण ९१ हरकती दाखल

Leave a Reply

Your email address will not be published. Required fields are marked *

तुमच्या प्रतिक्रिया

No comments to show.
All copy rights are reserve for nashikjournal.com