नाशिक रोड, प्रतिनिधी
नाशिक रोडसह परिसरात बिबट्यांचे राजरोसपणे दर्शन होत आहे. बिबट्यांना पकडण्यासाठी वनविभाग, पोलिस प्रशासने कंबर कसली आहे. त्याला यश येत आहे. जयभवानी रोडच्या चव्हाण मळ्यात लावलेल्या पिंज-यात शुक्रवारी पहाटे बिबट्या जेरबंद झाला.
सकाळी आठला बिबट्याच्या डरकाळ्या ऐकू येऊ लागल्याने नागरिक कुरेशी सय्यद व मुन्ना सय्यद यांनी ही माहिती शिवसेनेचे विक्रम कदम यांना फोनवर दिली. कदम यांनी जाऊन खात्री केली. त्यानंतर वनाधिका-यांना माहिती दिली. वनविभागाने नागरिकांच्या मदतीने बिबट्याला म्हसरूळच्या पुनवर्स केंद्रात हलविले.
जयभवानी रोडवर दाट लोकवस्ती आहे. शेजारी लष्कराचा दाट झाडीचा परिसर आहे. त्यामुळे त्या भागातून दिवसाढवळ्या बिबटे नागरी भागात येत आहेत. येथून जवळच असलेल्या वडनेर भागात बिबट्याने दोन महिन्यात दोन बालकांचे बळी घेतले होते. तसेच अनेक पाळीव जनावरे, कुस्त्री फस्त केली आहे. त्यामुळे संतप्त नागरिकांनी दोन वेळा वनविभाग कार्यालयावर मोर्चा काढला होता. जयभवानी रोड भागात बिबट्यांना पकडण्यासाठी तीन महिन्यांपासून पिंजरे लावण्यात आले होते. त्यात कोंबड्या ठेवण्यात आल्या होत्या. परंतु, नागरी वस्तीत पिंजरे लावल्याने त्यातील कोंबड्या काही लोक चोरून नेत असत. त्यामुळे पिंज-याच्या जागा बदलण्याची मागणी शिवसेनेचे विक्रम कदम, गणेश कदम, सागर जाचक, राजेंद्र थोरात, सलीम सय्यद आदी नागरिकांनी केली. वनविभागाच्या साथीने तीन आठवड्यापूर्वी पिंज-यांची जागा बदलण्यात आली. आज पिंज-यात बिबट्या अडकल्याने नागरिकांना दिलासा मिळाला आहे. नागरिकांनी वनविभागाचे अधिकारी, कर्मचारी, उपनगर पोलीस ठाण्याचे अधिकारी व कर्मचारी यांचे आभार मानले. नाशिक रोड, एकलहरा, देवळाली कॅम्प, देवळालीगावचा परिसर, वडनेरगेट, जयभवानी रोड येथील मनोहर गार्डन, औटे मळा, डोबी मळा, जाचक मळा, पाटोळे मळा, लोणकर मळा, थोरात मळा, चव्हाण मळा भागात अजूनही बिबटे आहेत. वनविभागाने नाशिक जिल्हा बिबट प्रवण क्षेत्र म्हणून घोषित करावे, बिबट्यांच्या प्रजनन नियंत्रणावर उपाययोजन कराव्यात, बिबट्यांचे स्थलांतर व्यवस्थापन करावे, बिबटे पकडल्यानंतर त्याच्या शेपटीत चीप बसवावी, लष्कराच्या कुंपणावर लेजर आधारीत सायरन लावावे, अशी मागणी विक्रम कदम व नागरिकांनी केली आहे.
मनसेचे शहर उपाध्यक्ष नितीन पंडित यांनी सांगितले की, रियाझ सय्यद हे सकाळी बिबट्या पंजऱ्यात अडकला की नाही हे बघायला गेले असता बिबट्या मादी पिंजऱ्यात अडकून निद्रा अवस्थेत होती. चार तासानंतर पिंजरा हलवण्यात आला. पिंजरा शेतात व चिखलता होता. तो हलविताना कसरत करावी लागली. त्यातच नागरिकांची बिबट्या सोबत सेल्फी घेण्यासाठी एकच झुंबड उडाली व मोठ्या प्रमाणात बघ्यांची गर्दी होती. जयभवानी रोड येथील मळे विभागात पिंजरा आणखी लावावेत, अशी मागणी मनसेचे शहर उपाध्यक्ष नितीन पंडित यांनी केली आहे. दरम्यान, रात्री परिसरात कुत्र्यांच्या भुंकण्याचा आवाज मोठ्या प्रमाणात असतो. बिबट्या आला की काय अशी नागरिकांना मध्ये भीती असते.
