सोमवारी झेडपी गट- पंचायत समिती गण सोडत

नाशिक,प्रतिनिधि : जिल्हा परिषद गट व पंचायत समिती गणांच्या आरक्षणाबाबत संदिग्धता असली तरी प्रशासनाने त्यांना यापूर्वी निवडणूक आयोगाकडून प्राप्त झालेल्या सूचनांप्रमाणेच कार्यवाही सूरु ठेवली आहे. येत्या सोमवारी (ता.१३) शहरातील महाकवी कालिदास कलामंदिरात सकाळी ११ वाजता जिल्हा परिषद गटांची आरक्षण सोडत निघेल. गणांची आरक्षण सोडत संबंधित तहसीलदार काढणार आहेत.
जिल्हा परिषद व पंचायत समित्यांच्या निवडणुकीत गट व गणनिहाय चक्राकार (आळीपाळीने) पध्दतीने आरक्षण निश्‍चित होते. प्रशासनाला या संदर्भातील कार्यवाहीच्या सूचना दिलेल्या आहेत. त्याचा अवलंब करत ही कार्यवाही केली जाते. २०१७ च्या निवडणुकीनंतर साडेतीन वर्षे झाले तरी निवडणूका झालेल्या नाहीत. या पार्श्‍वभूमीवर महायुती सरकारने फिरत्या आरक्षण पध्दतीला ‘ब्रेक’ लावत नव्याने आरक्षण जाहीर करण्याचा निर्णय घेतला. म्हणजेच नव्याने आरक्षण लागू करण्यासाठी ही पहिलीच निवडणूक घोषित केली. या निर्णयाच्या विरोधात उच्च न्यायालय व सर्वोच्च न्यायालयातही याचिका दाखल झाली. या याचिका फेटाळून लावत न्यायालयाने सरकारचा निर्णय कायम ठेवला. मात्र, न्यायालयाच्या निकालपत्रात चुकिने मध्य प्रदेश सरकारचा उल्लेख करण्यात आला होता. त्यात दुरुस्ती करत न्यायालयाने फेरआदेश दिले. पण त्याचा आधार घेत १९९६ च्या फिरत्या आरक्षण पध्दतीनुसार निवडणूक घ्यावी किंवा नाही, याचा निर्णय घेण्याचे अधिकार निवडणूक आयोगाला दिले आहेत. राज्य निवडणूक आयोगाने या संदर्भातील आदेश निवडणूक उपजिल्हाधिकार्यांना अद्याप पारीत केलेले नाहीत. त्यामुळे आरक्षणाच्या पातळीवर कुठलाही निर्णय झालेला नसल्याने ही संदिग्धता निर्माण झाली आहे. परंतु, दुसरीकडे प्रशासनाने सोमवारी नव्याने लागू होणार्या आरक्षण पध्दतीनुसार सोडत काढण्याची तयारी पूर्ण केली आहे.
…
आदेशानंतरच आरक्षणात बदल
राज्य निवडणूक आयोगाने जिल्हाधिकार्यांना आरक्षणाबाबत नवीन काही आदेश दिले तरच प्रक्रियेत बदल होईल. अन्यथा, चक्राकार पध्दत रद्द ठरेल. शासनाने यापूर्वीच दिलेल्या निर्देशांनुसार नव्याने आरक्षण सोडत निघेल. त्यात लोकसंख्येच्या क्रमानुसार आरक्षण काढले जाईल. जिल्हा परिषदेच्या एकूण ७४ गटांमध्ये २९ गट हे अनुसूचित जमाती (एसटी), अनुसूचित जाती (एससी) साठी पाच गट, ओबीसींसाठी २० तर २० जागा या सर्वसाधारण प्रवर्गाला मिळतील. यातील प्रत्येक प्रवर्गातील ५० टक्के जागा महिलांसाठी आरक्षित आहेत.