हरकतीची मुदत संपली; ५ सप्टेंबरपासून सुनावणी
नाशिक| प्रतिनिधी|
साडे तीन वर्षाच्या कालावधीनंतर नाशिक महानगरपालिका निवडणुकीची रणधुमाळी उडणार आहे. त्याअनुषंगाने राज्य निवडणूक आयोगाने प्रभाग रचना जाहीर केली होती. त्यानंतर 22 ऑगस्ट ते गुरुवार (दि.4) पर्यत प्रभाग रचनेवर एकुण 91 हरकती दाखल झाल्या आहे. दरम्यान या हकरतींवर शुक्रवार (दि.5) पासून लगेचच हरकतीवर सुनावणी घेतली जाणार आहे.
…………………..
आगामी नाशिक महापालिका निवडणुकीसाठी पावने तेरा लाख मतदार मतदानाचा हक्क बजावून नवे कारभारी महापालिकेत निवडून देणार आहे. नाशिक महापालिकेची लोकप्रतिनिधींची राजवट 13 मार्च 2022 रोजी संपुष्टात आली होती. भाजपचे सतीश कुलकर्णी यांनी अखेरचे महापौर म्हणून काम पाहिले. त्यानंतर ओबीसी आरक्षणामुळे नाशिकसह राज्यातील स्थानिक स्वराज्य संस्थांच्या निवडणुका लांबल्या. अखेर सर्वोच्च न्यायालयाने चार महिन्यात निवडणुका घेण्याचे आदेश दिल्यानंतर शासन व राज्य निवडणूक आयोग कामाला लागले होते. पालिकेने प्रभाग रचना तयार करुन शासनाला पाठवल्यानंतर राज्य निवडणूक आयोगाने प्रभाग रचना प्रसिद्ध केली होती. जानेवारीत निवडणुकीचे बिगूल वाजणार आहे. नाशिक महापालिकेसाठी 31 प्रभाग कायम ठेवण्यात आले आहेत. रिपब्लिकन सेनेचे जिल्हाध्यक्ष अविनाश शिंदे यांनी प्रभाग 26 व 27 वर हरकत घेतली. हरकत नोंदवण्यासाठी प्रशासनाने मनपा मुख्यालयासह सिडको, सातपूर, नाशिकरोड, पंचवटी, नाशिक पूर्व व नाशिक पश्चिम या विभागीय कार्यालयांमध्ये गुरुवार पर्यत व्यवस्था करण्यात आली आहे. ज्या भागातील हरकती आल्या आहेत. त्याबाबत निवडणूक कक्षातील कर्मचाऱ्यांकडून अभ्यास सुरू करण्यात आला आहे. केलेल्या हरकतीमध्ये कोणत्या बाजू महत्वाच्या आहेत? याबाबी तपासल्या जात आहेत. प्रभाग रचनेवर 12 सप्टेंबर पर्यत सुनावणी घेतली जाणार आहे.
अंतिम प्रभाग रचना प्रसिद्ध 3 ऑक्टोबरला प्रसिद्ध होणार
हरकतींवर सुनावणीवरील शिफाअशी विचारात घेऊन प्राधिकृत अधिकाऱ्याकडून प्रभाग रचनेचा अंतिम करुन नगरविकास विभागास सादर केला जाइल. प्राधिकृत अधिकाऱ्याने अंतिम केलेला प्रभाग रचनेचा प्रस्ताव राज्य निवडणूक आयोगाला सादर केला जाईल. त्यानंतर राज्य निवडणूक आयोग अंतिम प्रभाग रचनेला मान्यता देइल. व 3 ते 6 ऑक्टोंबर दरम्यान राज्य निवडणूक आयोग यांनी अंतिम केलेली प्रभाग रचना प्रसिद्ध केली जाइल.
