मृतांना ५ लाखांची मदत जाहीर
जळगाव| प्रतिनिधी| जिल्ह्यातील पाचोरा येथील परधाडेजवळ रेल्वेचा भीषण अपघात झाला असून पुष्पक एक्सप्रेस मधून प्रवाश्यानी आग लागल्याच्या अफवेतून उड्या मारल्याने १२ जण चिरडून ठार झाल्याची दुर्दैवी घटना घडली आहे. मिळालेल्या माहितीनुसार सायंकाळी पाहुणे पाच वाजेच्या सुमारास ही घटना घडली. यातील जखमींना वैद्यकीय उपचारासाठी पाचोरा ग्रामीण रुग्णालयात व दोन खाजगी रुग्णालयात दाखल करण्यात आले. दरम्यान दुर्घटनेनंतर मुख्यमंत्री देवेंद्र फडणवीस यांनी मृतांना ५ लाखांची मदत जाहीर केली आहे.
सूत्रांनी दिलेल्या माहितीनुसार, जळगावहून मुंबईकडे जात असताना पुष्पक एक्सप्रेसमध्ये आगा लागल्याची अफवा पसरली, जीव वाचविण्यासाठी प्रवाशांनी चालत्या एक्सप्रेसमधून उड्या मारल्या, मात्र त्याचवेळी समोरून येणाऱ्या दिल्लीकडे जाणाऱ्या कर्नाटक एक्सप्रेसने उड्या मारलेल्या प्रवाश्याना चिरडले. त्यात १२ प्रवाशी ठार झाले, त्यामध्ये ९ पुरुष आणि तीन महिलांचा समावेश आहे. घटनेची माहिती मिळताच रेल्वे प्रशासन आणि जिल्हा प्रशासनच्या संपूर्ण यंत्रणा घटनास्थळी दाखल झाल्या. जिल्हाधिकारी आयुष प्रसाद, पोलीस अधीक्षक महेश्वर रेड्डी यांच्यासह जिल्हा प्रशासनाचे व रेल्वे विभागाचे वरिष्ठ अधिकाऱ्यांनी घटनास्थळी उपस्थित राहून मदतकार्य केले.
पालकमंत्र्याकडून घटनास्थळीचा आढावा
जळगाव जिल्ह्याचे पालकमंत्री गुलाबराव पाटील यांनी या दुर्दैवी घटनेची गंभीर दखल घेतली आहे. ते म्हणाले, “मी स्वतः परिस्थितीवर लक्ष ठेवून असून प्रशासनाला सर्वोतोपरी मदत पोहोचविण्याचे निर्देश दिले आहेत.”घटनास्थळी नियंत्रण कक्ष स्थापन करण्यात आला असून, मृत व जखमी प्रवाशांची माहिती मिळवण्यासाठी हा कक्ष कार्यरत आहे. मृतांच्या नातेवाईकांना मदत देण्याबाबत योग्य ती चर्चा देखील सुरू असल्याचे पालकमंत्र्यांनी सांगितले.
मंत्री गिरीश महाजन ही घटनास्थळी मदतीला सरसावले
दूर्घटनास्थळी मंत्री गिरीश महाजन पोहचून मदत व बचावासाठी आवश्यक गोष्टींचे व्यवस्थापन केलं तसेच जखमीची विचारपूस केली. याबाबत मुख्यमंत्री फडणवीस यांनी दृकश्राव्य संदेश जारी केला आहे. ही घटना अत्यंत दुर्दैवी असल्याचा उल्लेख करून त्यांनी म्हटले आहे की, काही लोकांचा मृत्यूची ही घटना अतिशय वेदनादायी आहे. जळगांव जिल्हा प्रशासन आणि रेल्वे प्रशासन समन्वयाने काम करीत असून, जखमींच्या उपचारासाठी तातडीने व्यवस्था करण्यात येत आहेत. घटनास्थळी आठ रुग्णवाहिका रवाना करण्यात आल्या आहेत. सामान्य रुग्णालय तसेच नजीकच्या इतर खाजगी रुग्णालयांना जखमींवर उपचारासाठी सज्ज ठेवण्यात आले आहे. ग्लासकटर, फ्लडलाईट्स इत्यादी आपातकालिन यंत्रणा सुद्धा सज्ज ठेवण्यात आल्या आहेत. संपूर्ण स्थितीवर आम्ही लक्ष ठेऊन असून, आवश्यक ती सर्व मदत तातडीने पुरविण्यात येत आहे. जिल्हा प्रशासनाच्या संपर्कात असल्याबाबतही मुख्यमंत्र्यांनी आश्वस्त केले आहे.
