लासलगाव| प्रतिनिधी|
नाशिक जिल्ह्यासह राज्यभरात नाफेड आणि एनसीसीएफ मार्फत तब्बल तीन लाख मेट्रिक टन कांद्याची खरेदी करण्यात आली होती. कांद्याच्या साठ्याची प्रतवारी दरम्यान तब्बल २० ते २५ टक्के कांदा खराब झाल्याचे समोर आले आहे. उर्वरित चाळी फोडल्यावर कांदा निकृष्ट कांद्याचे प्रमाण आणखी वाढण्याची शक्यता आहे. त्यामुळे खरेदी केलेला हा बफर स्टॉक प्रत्यक्षात किती उपयुक्त ठरेल हे लवकरच स्पष्ट होईल.
खरेदी केलेल्या बफर स्टॉकमधील कांद्याचा साठा आता मोठ्या प्रमाणावर खराब होऊ लागल्याचे गंभीर चित्र समोर आले आहे. कलकत्ता, गुवाहाटी आणि चेन्नई येथे कांदा पाठवण्यासाठी शासकीय गोडाऊनमधील चाळी फोडण्यात आल्यावर ही धक्कादायक बाब उघडकिस आली.
केंद्र सरकारच्या वतीने खरेदी केलेल्या या कांद्याच्या देखरेख व साठवणुकीची जबाबदारी खरेदीदार सहकारी संस्था व मंडळांवर सोपविण्यात आली आहे. मात्र, साठा खराब होऊ लागल्याने फक्त ६५ टक्के रिकव्हरी कशी साधायची हा मोठा प्रश्न संस्था चालक व संचालक मंडळांसमोर उभा राहिला आहे. खराब झालेल्या कांद्याची विल्हेवाट लावणे, इतर बाबींमुळे या संस्थांच्या आर्थिक घडामोडी आणखी गुंतागुंतीच्या होऊ लागल्या आहेत.
कांदा उत्पादक आर्थिक संकटात
दोन ते अडीच महिने उलटून गेल्यानंतरही नाफेड एनसीसीएफ ला दिलेल्या कांद्याचे पैसे मिळत नाही. दुसरीकडे हा कांदा बाजारात आल्यामुळे कांद्याचे बाजार भाव घसरल्याने शिल्लक असलेल्या कांद्याचा उत्पादन खर्चही
निघणे अवघड झाले. यामुळे या दुहेरी संकटामुळे आर्थिक नुकसान होत आहे.
