नाशिक -त्र्यंबक कुंभमेळाबाबत मुख्य सचिवांची बैठक
नाशिक| एनजे वृत्तसेवा| प्रयागराज येथे जो कुंभमेळा चालू आहे. त्याठिकाणी नाशिक परीक्षेत्रातील अधिकाऱ्यांचे पथक समक्ष जाऊन पाहणी दौरा करण्याचे निर्देश देण्यात आले. प्रयागराज येथे नाशिक पेक्षा तीन ते चार पटीने भाविकांची अधिक गर्दी होत असते, त्यामुळे तेथील सुव्यवस्था नियोजन याची समक्ष पाहणी करून तसे नियोजन व व्यवस्था आपल्या नाशिक शहरांमध्ये करता येईल काय या दृष्टीने अधिकाऱ्यांचे पथक पाठविण्याबाबत बैठकीत चर्चा करण्यात आली अशी, माहिती मनपा आयुक्त तथा प्रशासक मनिषा खत्री यांनी दिली.
मंगळवार ३१ डिसेंबर २०२४ रोजी राज्याचे मुख्य सचिव यांनी महाकुंभ संदर्भात मुंबई येथे बैठक आयोजित केली होती. या बैठकीमध्ये नाशिक विभागाचे विभागीय आयुक्त डॉ. प्रविण गेडाम यांनी सविस्तर सादरीकरण केले. यामध्ये नाशिक व त्र्यंबकेश्वर येथील सिंहस्थ कुंभमेळ्याच्या अनुषंगाने करावयाची कामे व संकल्पना बैठकीत मांडण्यात आल्या.
बैठकीस विविध विभागांचे सचिव देखील उपस्थित होते. या बैठकीत सीसीटीव्हीची कुठे कुठे आवश्यकता आहे याचा मुख्य सचिव यांनी आढावा घेतला तसेच गोदावरी नदीचे प्रदूषण कसे कमी करता येईल याबाबत देखील बैठकीत चर्चा करण्यात आली.
गोदावरी प्रदूषणाबाबत महानगरपालिकेने जे नियोजन केलेले आहे त्यामध्ये शहरी व ग्रामीण भागासाठी काय उपाययोजना करता येईल यावर चर्चा करण्यात आली. यासाठी नाशिक महानगरपालिका व नाशिक महानगर प्राधिकरण विकास मंडळ या दोघांनी मिळून मलनिःसारण विभागासाठी आराखडा तयार केलेला होता, त्याला बैठकीत मान्यता मिळाली आहे. यासाठी शासनाकडे निधीची मागणी करण्यात आलेली आहे. महाराष्ट्र शासन देखील माननीय केंद्र शासनाकडे निधीसाठी पाठपुरावा करणार आहे. यामध्ये जवळपास ९ मलनिःसारण केंद्रांचे अद्यावतीकरण करणे व नवीन केंद्राची उभारणी ही कामे हाती घेतली जाणार आहे.
तसेच रिव्हर फ्रंट डेव्हलपमेंट कशा प्रकारे विकसित करता येईल त्याचे नियोजन करून आराखडा तयार करावा लागणार आहे, यासाठी तज्ञ सल्लागार एजन्सीची नेमणूक करण्याची प्रक्रिया सुरू करावयाची आहे. यासाठी निधीची उपलब्धता करण्यात आली आहे.
तसेच रामकालपथ यासाठी केंद्र शासनाकडून निधी मंजूर झालेला आहे. त्याचे काम लवकरात लवकर सुरू करण्यासाठी प्रयत्न केले जाणार आहे, यासाठी देखील तज्ञ सल्लागार समितीची नेमणूक करून काम सुरू केले जाणार आहेत. मार्च २०२६ पर्यंत संपूर्ण निधी खर्च होईल या दृष्टीने नियोजन केले जाणार आहे, त्यासाठी लवकरच निविदा प्रक्रिया सुरू केली जाणार आहे.
तसेच मल्टी मोटर ट्रान्सपोर्ट हब उभारणीबाबत विभागीय आयुक्त यांनी बैठकीत सादरीकरण केले, यामध्ये विभागीय आयुक्त स्तरावर कुठे मध्यवर्ती हब उभारले जाऊ शकते व कशा प्रकारे त्याचा विकास करता येईल यावर बैठकीत चर्चा करण्यात आली व यासाठी देखील एक एजन्सी नेमून सर्व यंत्रणा एकत्रित बैठक घेऊन विचार विनिमय करून जागा निश्चित करण्याची काम हाती घेतले जाणार आहे. व्यावसायिक स्वरूपाचे व नागरिकांना सोयीस्कर असे हब उभारणीसाठी मेट्रो, रेल्वे, बसेस, आणि रोड या चार वाहतूक यंत्रणा कशा पद्धतीने कार्यान्वित करता येईल यावर बैठकीत चर्चा करण्यात आली. मनपातर्फे प्रसिद्धीपत्रकाद्वारे देण्यात आली आहे.
